Наш Рагнедусь (с), альбо Прэзентацыя на Нарачы

24 верасня гэтага года кіраўнікі і сябры суполкі "Літаратурнае прадмесце" арганізаваным дэсантам выправіліся у горад Мядзел, дзе мусіла адбыцца прэзентацыя кніг - нашага сябра Рагнеда Малахоўскага "Беражніца" і мясцовага журналіста Аляксандра Быкава "Кветка папараць".

Дэсант высадзіўся на ганку бібліятэкі, ён жа ганак "Музея народнай славы". Прыехалі мы ранавата, таму і выправіліся на агледзіны ў музей.

У кнізе наведвальнікаў Рагнед пакінуў "дробнапочыркавы" запіс, у якім старанна пералічыў нашую кампанію: рэдактар кнігі "Беражніца" Віктар Шніп, жонка рэдактара кнігі "Беражніца" і адначасова кіраўніца суполкі "Літаратурнае прадмесце" Людміла Рублеўская, удзячныя чытачы кнігі "Беражніца"... (Кажуць, каб назва кнігі добра запомнілася, трэ згадаць яе не менш за тры разы ;) Запомнілі назву кнігі "Беражніца" Рагнеда Малахоўскага?)

Наколькі я зразумела, спецыфіка прэзентацыі не ў сталіцы заключаецца ў тым, што ўсе прысутныя не толькі асабіста знаёмыя, але да таго ж гараць жаданнем выказацца. Дзве гадзіны мінчукі і мядзельцы "спаборнічалі" ва ўсхваленнях і "абдорванні" падарункамі Р. Малахоўскага і А. Быкава.

Калі ўсе нарэшце занялі свае месцы ў мікрааўтобусіку, нехта (не будзем паказваць пальцамі на юзэрпік) сказаў Рагнеду: "Забудзь усё, што мы табе казалі!" 

Працяг прэзентацыі ладзіўся ў санаторыі "Сосны" на беразе в. Нарач.

(Злева направа: Марына Быкава, Аляксандр Быкаў, Рагнед Малахоўскі, Юлія Новік, Аксана Бязлепкіна, Андрэй Ключнікаў, Мікола Кандратаў, Зміцер Арцюх).

Спяваліся арыі з опер і народныя песні, гаварыліся тосты, ладзіліся танцы, шпацыр ўздоўж санаторных маёнткаў і купанне ў возеры:

Рагнед Малахоўскі з беларускамоўнымі бацькамі Людмілай і Юрыем Малахоўскімі.  "Наш Рагнедусь", - ганарыцца малодшым сынам маці.

- Чаму цябе так незвычайна назвалі? - пытаюцца сябры.

- Бо чакалі дзяўчынку, - аджартоўваецца Рагнед.  

(Злева направа: Мікола Кандратаў, Андрэй Ключнікаў, Рагнед Малахоўскі, Яўген Рамяніца)

(Злева направа: Юлія Новік, кіраўніца суполкі "Літаратурнае прадмесце" Людміла Рублеўская, Аксана Бязлепкіна (euga).

(Злева направа: Яўген Рамяніца, Рагнед Малахоўскі, Віктар Шніп, Людміла Рублеўская,

Мікола Касцюкевіч, Аксана Спрынчан).

У той вечар усё было проста здорава, нават дасканала... Але бракавала пэўнай вастрыні!

І ўсё атрымалася :) Нас забылі забраць з санаторыя у дванаццаць гадзін.

Нас забралі ў дзве гадзіны ночы. :)))

У чаканні было вырашана, што ёсць нагода правесці пазачарговае пасяджэнне нашай суполкі.

Мы па традыцыі зрабілі "перапіс насельніцтва" і пачыталі вершы з нататнікаў (карыстаючыся святлом сотавых тэлефонаў).

У дзве гадзіны ночы, заўважыўшы між дрэў святло фар, мы зразумелі, што адчуваў Рабінзон, пабачыўшы з вострава ветразі караблёў. ;)

І ў чатыры раніцы родны дамафон сустрэў мяне радасным вішчаннем. :))